क्युआर कोड स्कॅन करा; अन सेकंदात नोंदवा तक्रार!

सोलापूर जिल्हाधिकाऱ्यांचा अभिनव उपक्रम; सेतू, आपले सरकारसह अन्यत्र नागरिकांची होणारी लुट थांबविण्यासाठी!

• आतापर्यंत क्विक रिस्पॉन्स कोडवर आठ तक्रारी प्राप्त

अस्सल सोलापुरी न्यूज नेटवर्क ||

सोलापूर :  सेतू, आपले सरकारसह अन्यत्र नागरिकांची होणारी लुट थांबविण्यासाठी सोलापूर जिल्हाधिकाऱ्यांनी एक अभिनव उपक्रम राबविला आहे. आपले सरकार सेवा केंद्र अथवा सेतू कार्यालयात अधिकचे पैसे मागितल्यास क्युआर कोडवर तक्रार नोंदवण्याची सुविधा उपलब्ध करण्यात आली आहे. केवळ क्युआर कोड स्कॅन केल्यास सेकंदात तक्रार नोंदविली जाणार आहे. प्रत्येक आपले सरकार सेवा केंद्र अथवा सेतू, जिल्हाधिकारी कार्यालय, तहसील व प्रांत कार्यालयात दर्शनी भागात क्युआर कोड लावण्यात आलेला आहे. आतापर्यंत क्विक रिस्पॉन्स कोडवर आठ तक्रारी प्राप्त झाल्या आहेत.

जिल्ह्यातील नागरिक, विद्यार्थ्यांना लागणारे विविध प्रकारचे दाखले उतारे व अन्य प्रमाणपत्रे ऑनलाईन पध्दतीने आपले सरकार सेवा केंद्र अथवा सेतू कार्यालयातून दिले जातात. परंतु, बऱ्याचदा आपले सरकार केंद्र अथवा सेतू कार्यालयात विविध दाखले, उतारे व प्रमाणपत्रे काढण्यासाठी आलेल्या सर्वसामान्य नागरिकांना मध्यस्थ व्यक्तीकडून शासनाने विहित केलेल्या रकमेपेक्षा अधिकच्या रक्कमेची मागणी करण्यात येत असल्याची वरिष्ठ अधिकारी यांच्याकडे तक्रारी प्राप्त झालेल्या आहेत.  त्यामुळे सोलापूरचे जिल्हाधिकारी कुमार आशीर्वाद यांनी सर्वसामान्य नागरिकांना मध्यस्थ व्यक्ती (एजंट) यांच्याकडून पैशाची मागणी होऊ नये अथवा झाल्यास तत्काळ तक्रार करता यावी, यासाठी प्रत्येक आपले सरकार सेवा केंद्र अथवा सेतू कार्यालयात दर्शनी भागात क्युआर (QR)कोड उपलब्ध करून देण्यात येत आहे,  संबंधित नागरिकांनी हा किंवा कोड स्कॅन करून यावर तक्रार नोंदवण्याची सुलभ सुविधा उपलब्ध करून देण्यात आलेली आहे, यावरील तक्रारीची तात्काळ दखल घेऊन त्यासंबंधी कारवाई करण्यात येणार आहे.

क्युआर कोड सोलापूर जिल्ह्यातील सर्व सीएससी सेंटर तसेच सेतू कार्यालय, तहसील कार्यालय आणि प्रांताधिकाऱ्यांच्या कार्यालयात लावण्यात आले आहेत. यामध्ये केंद्रचालकांनी दाखल्या साठी शासनाने ठरवून दिलेल्या दरापेक्षा अधिकची रक्कम मागणी केल्यास, दाखला विहीत मुदतीत दिला नाही अथवा विलंब केला तर, दाखल्या संदर्भात संबधिताला एसएमएस व्दारे माहिती न दिल्यास, एजंटाव्दारे संबधित नागरिकांकडे अधिकचे पैसे मागणी केल्यास अशा कोणत्याहीप्रकारच्या तक्रारी असल्यास नागरिकांनी यावर दिलेला क्युआर कोड स्कॅन केल्यास त्यावर तत्काळ आपली तक्रार नोंदविली जाते. तसेच आलेल्या तक्रारीच्या अनुषंगाने तातडीने चौकशी करुन पुढील कार्यवाही केली जाते. त्यामुळे नागरिकांना कोणाला भेटण्याची अथवा अधिकचे पैसे देण्याची गरज राहणार नाही. त्यामुळे नागरिकांनी जर असे प्रकार कोठे घडत असतील तर जिल्हा प्रशासनाने क्युआर कोड स्कॅन करून तक्रार नोंदवणीच्या दिलेल्या अद्यावत सुविधेचा नागरिकांनी लाभ घ्यावा असे, आवाहन जिल्हाधिकारी कुमार आशीर्वाद यांनी केले आहे.

• क्युआर कोड वर आठ तक्रारी प्राप्त :

• हा क्युआर कोड कोणत्याही मोबाईल ॲपवरून स्कॅन करून नागरिकांना सुलभरित्या तक्रार नोंदविण्याकरिता उपलब्ध करून देण्यात आलेला आहे. दि. १३ फेब्रुवारी २०२५ रोजीपर्यंत  एकूण ८ तक्रारी क्युआर कोडद्वारे नोंदविल्या गेलेल्या आहेत. या तक्रारीमधील १ तक्रारीबाबत अर्जदार यांना कळविण्यात आले आहे. उर्वरीत प्रकरणांबाबत चौकशी अहवाल प्राप्त करून तक्रारीत तथ्य आढळून आल्यास कडक कारवाई करण्यात येईल, असे निर्देश जिल्हाधिकारी आशीर्वाद यांनी सांगितले.

 तक्रारींचा तपशील:  उत्तर सोलापूर, अक्कलकोट, मोहोळ, पंढरपूर, माढा, या तहसील कार्यालयांकडे प्रत्येकी एक तक्रार अर्ज प्राप्त झाली असून, तहसील कार्यालय दक्षिण सोलापूरकडे एक अर्ज प्राप्त झाला आहे. तक्रार अर्ज हा आपले सरकार सेवा केंद्राच्या सेवाबाबत संबंधित नसल्याने सदरचा तक्रार अर्ज तहसीलदार दक्षिण सोलापूर यांना पुढील आवश्यक त्या कार्यवाहीसाठी पाठविण्यात आला आहे. व तहसील कार्यालय बार्शी कार्यालयाकडे २ अर्ज असे एकूण आठ अर्ज प्राप्त झाले असल्याचे प्रशासनाच्यावतीने कळविण्यात आले आहे.