राज्यातील कुशल मनुष्यबळाला जर्मनीत नोकरीची संधी

ऑनलाईन, ऑफलाईन स्वरुपात देणार जर्मन भाषा प्रशिक्षण 

by assal solapuri ||

सोलापूर : जर्मनीतील बाडेन – वुटेनबर्ग या राज्यास महाराष्ट्रातील  विविध क्षेत्रातील कुशल मनुष्यबळ पुरविण्यासाठी दि. २५ फेब्रुवारी २०२४ रोजी महाराष्ट्र शासनामार्फत सामंजस्य करार करण्यात आला असून, त्यामुळे जर्मनीत नोकरीची संधी उपलब्ध झाली आहे. त्यानुसार राज्यातील १० हजार कुशल मनुष्यबळ टप्याटप्याने पुरविले जाणार आहे. आरोग्य विभागातील परिचारिका, वैद्यकीय सहायक, रेडीओलॉजी सहाय्यक, केअर टेकर, कौशल्य विकास विभागातील सेवक, वेटर, स्वागत, कक्ष संचालक, स्वयंपाकी, हॉटेल व्यवस्थापक तंत्रशिक्षण विभागातील इलेक्ट्रीशीयन, औष्णिक वीज तंत्री, गवंडी कामगार, प्लंबर, वाहनचालक, सुरक्षारक्षक, पॅकर्स व मुव्हर्स अशा विविध ३० क्षेत्रातील कुशल मनुष्यबळ पुरवायचे आहे.

==================================================================================
यासाठी गोथे संस्थेच्यामार्फत ऑनलाईन व ऑफलाईन स्वरुपात जर्मन भाषा प्रशिक्षण देण्यात येणार आहे. सदर प्रशिक्षण सेवासदन प्रशाला, ज. रा. चंडक प्रशाला, नूतन प्रशाला, विजापूर रोड आणि औद्योगिक प्रशिक्षण संस्था (मुलींची) डफरीन चौक, सोलापूर या ठिकाणी प्रशिक्षणार्थींच्या सोयीनुसार सकाळ व संध्याकाळ सत्रात एकूण ५ प्रशिक्षण वर्ग आयोजित केले जाणार आहे.  आणखीन ५ वर्ग तालुकास्तरावर वाढविण्याचे नियोजन आहे. प्रत्येक वर्गात २५ प्रशिक्षणार्थी असतील. सदर जर्मन भाषा प्रशिक्षणासाठी शशिकांत शिंदे (अधिव्याख्याता, जिल्हा शिक्षण व प्रशिक्षण संस्था, वेळापूर जि. सोलापूर) हे समन्वयाचे काम करणार आहेत.

====================================================================================

सदर जर्मन भाषा वर्गाचे प्रशिक्षण पूर्ण झाल्यानंतर प्रशिक्षानार्थीना  त्यांच्या कामाच्या स्वरूपानुसार ए-१, ए-२, बी-१, बी-२ या स्तराच्या परीक्षा उत्तीर्ण होणे आवश्यक आहे. या प्रशिक्षणास प्रति व्यक्ती ३३ हजार रुपये खर्च शासन करणार आहे. त्यानंतर गरज लागली तर संबधित क्षेत्रातील तांत्रिक कौशल्य प्रशिक्षण सुद्धा  देण्यात येणार आहे. या प्रकल्पाच्या प्रभावी अंमलबजावणीसाठी जिल्हास्तरीय समिती गठीत करण्यात आली आहे. डायटचे प्राचार्य हे मुख्य समन्वयक म्हणून काम पाहणार आहेत. या संदर्भात दि. ११ जुलै २०२४ रोजी शासन निर्णय निर्गमित करण्यात आला आहे. जर्मन भाषा शिकून जर्मनीत नोकरी करण्यास इच्छुक असलेल्या कौशल्यप्राप्त व्यक्तींनी पुढील लिंकवर नावनोंदणी करावी. https://www.maa.ac.in/GermanyEmployment/.जर्मन भाषा शिकविणाऱ्या तज्ञ व्यक्तींचे प्रमाण वाढण्यासाठी स्थानिक स्वराज्य संस्था आणि अनुदानित शिक्षकांना जर्मन भाषा प्रशिक्षण देण्यात येणार आहे. म्हणून जिल्ह्यातील ज्या शिक्षकांना जर्मन  भाषा शिकायची आहे, त्यांनी https://forms.gle/1Q32ByNwp9MnHmHc7 या लिंकवर नाव नोंदणी करावी असे आवाहन डायटचे प्राचार्य जितेंद्र साळुंखे यांनी केले आहे.