सोलापूर विभागीय हातमाग कापड स्पर्धा: विभागीय हातमाग कापड स्पर्धेत ६३ विणकरांचा सहभाग
अस्सल सोलापुरी न्यूज नेटवर्क ||
सोलापूर : सोलापुरात पार पडलेल्या विभागीय हातमाग कापड स्पर्धेमध्ये सहकारी आणि खाजगी विणकर सहकरी संस्थेतील ६२ विणकरांनी सहभाग नोंदवत त्यांनी उत्पादीत केलेल्या पारंपारिक व अपारंपारिक वाण सादर केले. या स्पर्धेमध्ये काशिनाथ महादेव सातलगांव आणि विठोबा तिपण्णा मोने या विणकरांना प्रथम क्रमांकाचे (विभागून) पारितोषिक देण्यात आले. द्वितीय क्रमांकाचे पारितोषिक अशोक सुरेश टिपरे, श्रीनिवास इरण्णा मोने, राजेंद्र अंकम, सुजाता सोमा यांना (विभागून) देण्यात आले. अश्विनी नदाल, महेश सुंचू, श्रीधर कटकूर, शरण्णप्पा म्हेत्रे, लाडप्पा मड्डे यांना तृतीय क्रमांकाचे पारितोषिक (विभागून) देण्यात आले. यावेळी एकूण ११ स्पर्धकांना प्रशस्तीपत्रक व बक्षीस पात्र धनादेशाचे वितरण करण्यात आले.
विभागीय हातमाग कापड स्पर्धामध्ये सादर केलेल्या वाणाचे शासनाने नियुक्त केलेल्या निवड समितीने विणकरांनी उत्पादीत केलेला वाणाचे अतिउत्कृष्ट, कलात्मक, नाविन्यपूर्ण, रंगसंगतीयुक्त आणि कलाकौशल्यपूर्ण असलेल्या वाणाची निवड करण्यात आली. सहकार, पणन व वस्रोद्योग विभाग, वस्रोद्योग आयुक्तालय, नागपूर व प्रादेशिक उपआयुक्त, वस्त्रोद्योग, सोलापूर यांच्या संयुक्त विद्यमाने विभागीय हातमाग कापड स्पर्धा सोलापूर जिल्हा यंत्रमाग धारक संघ (अक्कलकोट रोड, एम.आय.डी. सी. सोलापूर) कार्यालयात पार पडल्या.
राज्यातील हातमाग व्यवसायातील हातमाग विणकरांना प्रोत्साहन देण्यासाठी हातमाग विणकर सहकारी संस्था, स्वयंसहाय्यता गट व खाजगी क्षेत्रातील हातमाग विणकरांसाठी हातमाग कापड स्पर्धा व बक्षिस योजना राबविण्यात येते. सदर कापड स्पर्धेसाठी हातमाग विणकरांनी हातमागावर विणलेल्या पारंपारीक व अपारंपारीक डिझाईनच्या अतिउत्कृष्ट नाविण्यपूर्ण व कलात्मक वाणाची प्रदर्शीत वाणामधून निवड केली जाते. त्यातून उत्कृष्ट वाणास प्रोत्साहनपर बक्षिस देवून हातमाग विणकरांना प्रोत्साहन देण्यात येत आहे. त्यानुषंगाने पारंपारीक व अपारंपारीक वाणाचे कापड उत्पादन करणाऱ्या विणकरांकरिता सन २०१६-१७ पासून विभागीय स्तरावर विभागीय हातमाग कापड स्पर्धा आयोजित करण्यात येत आहे.
शासनाने दि. १७ ऑक्टोबर २०१६ च्या शासन निर्णयान्वये ही स्पर्धा विभागीय हातमाग कापड स्पर्धा असे नामकरण करुन विभागीय स्तरावर आयोजित करण्याचे निश्चित केलेले आहे. प्रादेशिक उपआयुक्त वस्रोद्योग, सोलापूर यांच्या अधिपत्याखालील जिल्ह्यासाठी सोलापूर जिल्ह्यासह सांगली, कोल्हापूर, सातारा व पुणे या जिल्ह्यातील प्राथमिक हातमाग विणकर सहकारी संस्था, स्वयंसहाय्यता गट व खाजगी क्षेत्रातील हातमाग विणकरांना प्रोत्साहन देण्यासाठी हातमाग कापड स्पर्धा घेण्यात आली.
विभागीय हातमाग कापड स्पर्धा निवड समितीत विभागीय आयुक्त (महसूल) पुणे हे अध्यक्ष आहेत. जिल्हा माहिती अधिकारी, संचालक विणकर सेवा केंद्र मुंबई, सहाय्यक आयुक्त, सोलापूर हे सदस्य असून, प्रादेशिक उपआयुक्त वस्रोद्योग, सोलापूर आहेत. सदर विभागीय कापड स्पर्धाचे आयोजन, तहसीलदार (करमणूक शुल्क) सोलापूर शिल्पा ओसवाल यांच्या अध्यक्षतेखाली व प्रशासक सोलापूर जिल्हा मध्यवर्ती सहकारी बँक लि. सोलापूर कुंदन भोळे यांच्या प्रमुख उपस्थितीत करण्यात आले. जिल्हा माहिती अधिकारी सोलापूर व विणकर सेवा केंद्र, मुंबई या कार्यालयाच्यावतीने व्ही.एस. यादव, मनिष पौनिकर, तांत्रिक सहाय्यक ए.सी. कोकल, सहाय्यक उपआयुक्त् निलेश निखाडे यांच्या उपस्थितीत हा कार्यक्रम पार पडला. सूत्रसंचालन तांत्रिक अधिकारी ए. एम. गोरे यांनी केले.
