सोलापूर : प्रतिनिधी
आटपाट आणि झी स्टुडिओज् निर्मित (ZEE STUDIO PRODUCTION), हेमंत जंगल अवताडे दिग्दर्शित ‘घर बंदुक बिरयाणी’ (Ghar Banduk Biryani) चित्रपट (Movie) सिनेरसिकांच्या भेटीस येतोय. या चित्रपटात नागराज मंजुळे (Nagraj Manjule), सयाजी शिंदे, आकाश ठोसर आणि सायली पाटील यांच्या प्रमुख भूमिका आहेत. येत्या ०७ एप्रिल रोजी ‘घर बंदूक बिरयानी’ हा एकाच वेळी मराठीसह हिंदी, तामिळ आणि तेलुगु भाषेत प्रदर्शित होत असल्याची माहिती सुप्रसिद्ध दिग्दर्शक तथा अभिनेते नागराज मंजुळे यांनी सोमवारी दुपारी पत्रकारांशी बोलताना दिली.
चित्रपटाच्या प्रमोशनसाठी ‘घर बंदुक बिरयानी’ची टिम सोमवारी सोलापूरात दाखल झाली होती. याप्रसंगी नागराज मंजुळे बोलत होते. याप्रसंगी सिने अभिनेता आकाश ठोसर, अभिनेत्री सायली पाटील, ज्येष्ठ अभिनेते सयाजी शिंदे आणि झी स्टुडिओज् चे मंगेश कुलकर्णी उपस्थित होते. यावेळी नागराज मंजुळे म्हणाले, हा चित्रपट एक वेगळा विषय घेऊन सिनेरसिकांच्या भेटीस येत आहेत.
नागराज मंजुळे हे नेहमीच प्रेक्षकांसाठी काहीतरी भन्नाट विषय घेऊन येत असतात. हे मराठी सिनेरसिकांनी अनुभवले आहे. ‘घर बंदूक बिरयानी’ च्या ट्रेलरमध्ये पोलीस आणि टोळीची चकमक दिसते. यात एका तरूणाचाही सहभाग दिसत आहे. हा पाठलाग कशासाठी आहे आणि यातून पुढं काय ? ची उत्कंठा, हे चित्रपट पाहिल्यावरच कळेल. चित्रपटात प्रेमकहाणीचा ताना-बाना खुलताना दिसत आहे. चित्रपटातील प्रत्येक गाणे श्रवणीय आणि सुंदररित्या चित्रित करण्यात आले आहे. आशिष कुलकर्णी आणि कविता राम यांचा सुमधुर आवाज लाभलेले ‘गुन गुन’ हे गाणे प्रत्येकाच्या ओठांवर रेंगाळणारे आहे. ‘आहा हेरो’ या जबरदस्त गाण्याला प्रवीण कुवर, विवेक नाईक, संतोष बोटे, राहुल चिटणीस यांचा आवाज लाभला असून गणेश आचार्य यांचे या गाण्याला नृत्य दिग्दर्शन लाभले आहे. तर ‘घर बंदूक बिरयानी’ हे टायटल सॉन्ग बॉलिवूडचे (Bollywood) प्रसिद्ध गायक मोहित चौहान यांनी गायले आहे. चित्रपटातील गाण्यांना ए. व्ही. प्रफुल्लचंद्र यांनी संगीत दिले असून वैभव देशमुख यांनी गाणी शब्दबद्ध केली आहेत. असं असले तरी चित्रपटाचं कथानक चित्रपटगृहातच सिनेरसिकांसमोर येईल, असे नागराज मंजुळे म्हणाले. खरंतर हा चित्रपट करण्यास मी आधी नकार दिला होता, मात्र माझ्या नकाराचे नकळतच होकारात रूपांतर झाले. चित्रपटाची कथा चांगली आहे, त्यानुसार गाण्यांचेही लेखन अन् त्याला साजेसे असे संगीत आहे. या चित्रपटात नेमके काय आहे ? हे प्रेक्षकांना लवकरच कळेल, असंही नागराज मंजुळे म्हणाले.
‘घर बंदूक बिरयानी’ ची नक्कीच पसंतीस उतरतील : मंगेश कुलकर्णी
“बिर्याणी”मध्ये सगळे जिन्नस असतात आणि त्याची प्रत्येकाची एक खासियत असते. जी बिर्याणीला अधिक चविष्ट बनवते. तशीच या चित्रपटात विविध प्रकारची गाणी आहेत. जी संगीतप्रेमींना नक्कीच आवडतील आणि मुळात नागराज मंजुळे यांच्या प्रत्येक चित्रपटातील गाणी ही खासच असतात. तशीच ‘घर बंदूक बिरयानी’तीलही आहेत.’’असे झी स्टुडिओजचे व्यवसाय प्रमुख मंगेश कुलकर्णी यांनी सांगितले.